Teño recollido do xornal que se trata do acrónimo de dúas palabras suecas que significan 'morte' e 'orde, limpeza', respectivamente. Trátase da criba profunda feita na casa como favor aos nosos herdeiros.
Así que, nestes días de pouco quefacer e algunha neura, resolvín emprender un döstädning non exhaustivo: neste momento agardan no fondo do contedor de papel para reciclado décadas de xustificantes bancarios da pensión por alimentos da señorita Kaplan (parte da historia financeira deste principio de século con selos e membretes de caixas de aforro e bancos desaparecidos), recibos de electrodomésticos que xa non teño, notificacións de multas (a máis antiga, aínda en pesetas), e analíticas para médicos de dúas provincias nas que xa non vivo.
