Bicado da recendente
suavidade da mañá,
o escudo de cruz vermella
cinxido polo brazal,
espora de ouro calzada,
luminosa espada na man,
o corazón esforzado,
aceso e limpo de mal,
costa arriba, mentres zoa
no vento maino e levián
de secreta campaíña
o tanxido de cristal,
sobe o nobre cabaleiro,
no seu soño a cabalgar,
a montaña milagreira
do Cebreiro-Montsalvat.
R. Cabanillas: Na noite estrelecida
